حازم جابر

يالـعيونك سمه وطول الحواجب ليل
ضمني بسمه عيونك اسهر واغفه
ويا ضي الوجه يالماطفيت بيوم
صدكني الكمر من يشتعل يطفه
ويا قوس القزح كل ساعه اشوفك لون
ويمر مرات لونك بيه ماعرفه
تحل ليل الشعر حد مايلوح الكاع
وتعظ الزلوف بدورة الشفه
طبع بينه الجرح ندعيله حتى يطيب
الك بيه جرح ادعيله مايشفه
وتسالني شعجب ماوصفتني يوم
وانه الحاير بظلك لسه مموصفه
..
ياأبو صوت اليغرد ياسحر فيروز
لك اجمل لحن بشفافك تعزفه
تمر مثل النهر والخطوه روجة ماي
واظل انه اعله جرفك حاصد الوسفه

"""""





ويالخصرك مدور كَمر عالي بعيد
مد ايده الكَـلب مالاحكَ بجفه
من عينك نده ينزل وشوفه يطيح
يلتم بورود جفوفك الترفه
تلتف اعله طولك كل نجوم الليل
ويجي ينام الكَـمر متوسدك صفه
واظم سرك عليه وماابوحن بيه
واذا دمعك بعينك عيني لتذرفه
كل اصبع بجفك يضوي شمعه بليل
وكل خصلة شعر من كَـذلتك عفه
يا جمار عالي وماأظن تنلاح
لان عثكَـك هدل ماشالته السعفه
اذا بميزان انتة وكل حواري العين
ماأظنن لغيرك تنزل الكفه
احلى من العسل بـالشفه من تنظاكَ
ومرح مثل النسيم ودمك شخفه
حدر زيجك نهر مضموم ما ينشاف
لان الله طبكَـها الضفه عـالضفه
يا اول نده ينكَط شعر للروح
ويـالمشذر محبه وضحكَتك زفه
شمس الله واكبر نزلت اعله الكَاع
اجت يمك حبيبي تريد تدفه